Moita xente cre que ninguén vai atacar a súa web porque é pequena. E en algo ten razón: ninguén a vai atacar a man. Fano programas que percorren internet día e noite sen mirar de quen é cada web.
Que buscan eses programas
Non buscan a túa web en concreto. Buscan calquera web cunha porta mal pechada: un plugin cun fallo coñecido, un contrasinal débil ou unha versión antiga. Cando a atopan, entran sós.
Despois usan a túa web para enviar spam, mandar as túas visitas a outras páxinas ou agochar ligazóns que ti non ves pero Google si. A miúdo o dono decátase semanas máis tarde, cando Google avisa de que a web non é segura.
Por que WordPress é o branco máis habitual
O motivo é sinxelo: está en todas partes. Catro de cada dez webs do mundo usan WordPress. Un fallo nun plugin popular abre miles de webs á vez, así que a quen ataca compensalle buscalo.
Os datos de Patchstack, unha empresa dedicada á seguridade de WordPress, déixano claro. En 2024 publicáronse 7966 fallos novos en WordPress e nos seus complementos. O 96 % estaba en plugins, non en WordPress en si. E un 43 % podíase aproveitar sen iniciar sesión.
Por iso as actualizacións importan tanto. Cada plugin da túa web é unha porta máis, e cada unha depende de que alguén a peche a tempo.
Que hai para atacar nunha web estática
Moi pouco. Unha web estática é un conxunto de arquivos xa feitos:
- Non hai base de datos que roubar nin que borrar.
- Non hai páxina de acceso na web pública, así que non hai contrasinal que adiviñar.
- Non hai plugins que queden vellos.
- Non hai código que se execute no servidor cando alguén a visita.
Un programa que busca fallos de WordPress pasa pola túa web e non atopa nada que probar.
O que segue nas túas mans
Case nada non é nada. Nunha web estática, o que hai que protexer son as contas: a do dominio, a do aloxamento e a do editor. Quen entre nelas pode cambiar a web ou quedar co dominio.
A solución é sinxela e serve para calquera web: un contrasinal distinto en cada unha desas contas e a verificación en dous pasos activada.
Se xa tes WordPress
Non tes que cambiar mañá. Pero convén que saibas responder a tres preguntas:
- Quen actualiza a túa web, e cada canto?
- Cantos plugins tes, e cales non usas?
- Tes unha copia de seguridade recente gardada fóra do servidor da web?
Se algunha resposta é «non o sei», escríbeme e mirámolo xuntos.