É a pregunta que máis me fan cando explico que é unha web estática. Se as páxinas xa están feitas, quen as cambia cando chega o horario de inverno?
A resposta curta é que ti, se queres. A longa está aquí, xunto con algo que case ninguén che conta: cando unha web estática non é a mellor opción.
Como se edita
Unha web estática pode ter un panel de edición, igual ca WordPress. A diferenza está no que pasa despois de gardar.
- Entras no panel desde o navegador.
- Cambias o que precises: o horario, un prezo, unha foto ou o texto dunha páxina.
- Premes «Gardar».
- Nun ou dous minutos, a web xérase de novo soa e o cambio xa está publicado.
Non hai que tocar código nin saber nada de servidores. Ademais, o panel só amosa o que ten sentido cambiar na túa web. Se tes unha carta, ves a carta. Se tes horarios, ves os horarios.
A web de Linguas Tecidas funciona así: o grupo engade as próximas sesións desde o seu propio panel, sen tocar unha liña de código.
Ou non o edites
Moita xente prefire non aprender outro panel. Nese caso, mándasme unha mensaxe co cambio («o domingo abrimos de 10 a 14») e fágoo eu. Un cambio é unha frase, non un proxecto.
Cando WordPress segue sendo mellor
Unha web estática é a ferramenta axeitada para a maioría dos negocios pequenos que non venden en liña. Pero non para todos. WordPress, ou outra ferramenta parecida, ten máis sentido se:
- Vendes en liña, con catálogo, carro e pagamentos. Aí precisas unha tenda de verdade, como WooCommerce ou Shopify.
- Tes unha zona de socios, con usuarios que inician sesión e ven contido distinto.
- Publican a diario varias persoas, con permisos distintos e alguén que revisa antes de publicar.
- A túa web é unha comunidade, con comentarios, foros ou perfís.
O que non precisa WordPress é un sistema de reservas. A maioría dos motores de reservas para aloxamentos e restaurantes pódense inserir en calquera web, tamén nunha estática.
A idea detrás desta serie
Nestes artigos falei do que custa unha web a cinco anos, de por que a velocidade trae clientes e de por que unha web estática ten tan pouco que atacar. Os catro din o mesmo: para un negocio que non vende en liña, o sinxelo adoita ser o máis útil e o máis barato.
Se dubidas sobre que che convén a ti, escríbeme. Direiche o que faría eu, aínda que sexa «quédate co que tes».